الأسئلة الشائعة

التنازل هو إنك تنقل عقدك مع المطوّر لشخص تاني. المشتري بيرد لك اللي دفعته للمطوّر، وبيكمّل هو الأقساط الباقية باسمه. العملية بتتم رسميًا في مقر المطوّر. وكل العروض على عقارات لقطة بتكون للتنازل بدون أوفر.

الرقم الكبير هو «المطلوب دفعه كاش» — إجمالي اللي بتدفعه مرة واحدة عشان تاخد الوحدة. وهو جزئين بيتعرضوا تحته: تعويض للبائع بقيمة اللي دفعه للمطوّر، ورسوم لسه مستحقة بتتدفع للمطوّر نفسه مش للبائع. الأقساط الباقية بتدفعها للمطوّر مباشرة بعد كده، والعمولة منفصلة.

لأ. مفيش أي مبلغ مضاف فوق أرقام العقد على المنصة. اللي بتشوفه هو أرقام العقد الحقيقية زي ما البائع أدخلها وإحنا راجعناها. عمولة المنصة معلنة من الأول: صفر على البايع، و1.25% على المشتري من قيمة التعاقد، وتستحق عند إتمام النقل بنجاح بس.

المشتري. البايع مش بيدفع أي عمولة ولا رسوم خالص — لا عند عرض الوحدة ولا عند إتمام النقل. العمولة 1.25% من قيمة التعاقد المنقول، بتتحسب وبتتعرض على المشتري بالجنيه قبل ما يبعت طلب الاهتمام، ولو الصفقة ما تمّتش مفيش أي مستحقات على حد.

معناها إن حد من فريقنا شاف العقد وإيصالات السداد فعلاً وطابقها بالأرقام المعروضة. لو الوحدة لسه ما اتراجعتش، هتلاقي مكتوب «لم يتم التوثيق بعد» بوضوح.

أبدًا. العقد وإيصالات السداد بتتخزّن بشكل مشفّر وخاص، وبيشوفها فريق المراجعة بس. المشتري بيشوف الأرقام، مش الورق.

لأ. البيانات دي خاصة بينك وبين فريق عقار لقطة بس، ومش بتظهر في صفحة الوحدة ولا بتوصل للمشتري بأي شكل.

عادة من يوم لتلاتة حسب اكتمال المستندات. لو في حاجة ناقصة هنتواصل معاك ونقول لك بالظبط إيه المطلوب.

عشان نتأكد إن وسيلة التواصل شغالة قبل ما نبدأ في معاملة بمبالغ كبيرة. كل التحديثات المهمة بتوصلك عليه.

بنقبل حاليًا Gmail و Outlook و Yahoo و iCloud و Proton و Zoho، بالإضافة لبريد الشركات اللي شغّال على Google Workspace أو Microsoft 365. لو عندك بريد شركة مش شغّال ولا مقبول، ابعت لنا من صفحة الاقتراحات ونضيفه.

أثناء المراجعة الأرقام بتتقفل عشان الفريق يشتغل على نسخة ثابتة. لو محتاج تعدّل، كلّم الفريق وهيرجّع لك الطلب.